Cyclone Alert देशभरात मान्सूनचे स्थलांतर सुरू झाले आहे. मात्र, महाराष्ट्रात पावसामुळे अनेक ठिकाणी मोठी हानी होत आहे. दरम्यान, हवामान खात्याने दिलेल्या माहितीनुसार, बंगालच्या उपसागरात ‘दाना’ नावाचे चक्रीवादळ निर्माण झाले आहे, ज्यामुळे बळीराजाची चिंता वाढली आहे. या चक्रीवादळामुळे महाराष्ट्रात पुन्हा एकदा अतिवृष्टीचा तडाखा बसण्याची शक्यता हवामान खात्याने व्यक्त केली आहे.
दाना चक्रीवादळामुळे बंगालच्या उपसागरावर गंभीर परिणाम होण्याची शक्यता आहे. हवामान खात्याच्या अंदाजानुसार, पश्चिम बंगालच्या दक्षिण भागापासून दक्षिण भारतापर्यंत मुसळधार पाऊस पडण्याची शक्यता आहे. हे चक्रीवादळ 24 ते 26 ऑक्टोबर दरम्यान पूर्व किनारपट्टीवर धडकण्याची शक्यता आहे, ज्यामुळे भारत, बांगलादेश आणि म्यानमारमध्ये संभाव्य परिणाम होऊ शकतात. त्यामुळे स्थानिक प्रशासनाने खबरदारीचे उपाय घेण्यास आणि नागरिकांनी सतर्क राहण्यास सांगितले आहे.
वादळाच्या प्रभावामुळे दक्षिण भारतात आणि काही पश्चिम भागांत हवामानात मोठ्या प्रमाणात बदल होताना दिसत आहे. तामिळनाडू, आंध्र प्रदेश आणि ओडिशाच्या किनारी भागात मुसळधार पावसाची शक्यता आहे, ज्यामुळे पूरस्थिती उद्भवण्याचा धोका आहे. महाराष्ट्रातसुद्धा कोकण, गोवा, मध्य महाराष्ट्र आणि मराठवाड्यात हलका ते मध्यम पाऊस होऊ शकतो. या पावसामुळे शेती, वाहतूक आणि सामान्य जनजीवनावर परिणाम होण्याची शक्यता आहे. योग्य ती खबरदारी घेणे आवश्यक आहे.